Fonte do Picho
Cesantes, Redondela
Localización
Esta fonte está situada no camiño do Picho, xunta á confluencia coa rúa da Torre de Calle e a estrada de Zacande.
Case en fronte localízase tamén o lavadoiro do Picho. Os dous elementos forman un conxunto etnográfico.
Descrición
A fonte está asentada sobre unha gran plataforma de pedra. No centro dispuxéronse dous grandes perpiaños encostados e acaroados.
Sobre esta base, a modo de tampa, superpúxose un perpiaño en horizontal que recobre os dous perpiaños inferiores.
Entre esta tampa e a base, sobresae un picho ou billote polo que sae a auga. O picho é o que lle dá nome á fonte e ao lavadoiro que se atopa preto da fonte.
Sobre a tampa presenta un coroamento decorativo con bordos lobulados e remate superior triangular. Na parte central figura o ano de construción enmarcado por un rebaixe cuadrangular: 1923.
