Rúa de Reveriano Soutullo

Redondela, Redondela

A rúa leva o nome dun dos músicos máis célebres que deu Galicia para o mundo: Reveriano Soutullo (1880-1932)

Naceu circunstancialmente en Ponteareas, pero pasou os seus anos novos de vida en Redondela, onde tiña ademais a súa familia.

A súa vocación e sabenza temperá para a música demóstraa por dirixir o coro da catedral de Tui con só dezaseis anos. A partir da súa formación, a súa vida foi un continuo crecemento súa arte musical e nos recoñecementos dos que foi merecedor ao longo da súa vida. Destacou principalmente na composición de zarzuelas, entre as que inmortalizou a sempre repetida “Leyenda del beso”.

Entramos nesta rúa pola antiga porta do Ribeiro (cando a vila estaba amurallada) e era unha das arterias interiores do burgo amurallado. Durante aquela época histórica, había unha porta en cada extremo da rúa: unha delas daba á antiga praza do Estaleiro (hoxe praza da Constitución).

A outra porta daba á actual praza de Alejandro Otero, a través da vella porta do Ribeiro, denominada así seguramente por embocar directamente na ponte que marchaba cara a Vilavella e posteriormente ás terras do Ribeiro, que tanto comercio de viño mantiñan entre o interior e as vilas da costa. Curiosamente o nome das dúas portas expresan claramente esta conexión: a porta do estaleiro, que dá ao porto de Redondela e ao mar, e a porta do Ribeiro, que miraba ás terras vitivinícolas do interior de Galicia.

Ao longo desta rúa iremos comentando algunhas das casas singulares que atoparemos durante o noso paseo. Destaca a exuberancia da pedra que domina todos os espazos e a vista interminable dos tradicionais balcóns corridos que enchen as fachadas das casas da vila de Redondela.